Pages

Muli.

Linggo, Agosto 3, 2014

Kagabi, nagkaroon ako ng pagkakataong mapakinggan ang isa sa mga ipinagmamalaki ng Original Pinoy Music. Hindi pa rin kumukupas ang galing ni Gary Valenciano at muli niyang pinatunayan ang gaslaw sa entablado at ang kakayanan niyang umawit nang mula sa puso. Hindi maikakailang siya pa rin ang Mr. Pure Energy. Hindi naging balakid ang kanyang edad upang makapaghatid ng world class na pang-aliw sa kanyang mga manunood.

Naging malaking bahagi rin si Gary V. ng aking buhay sa pamamagitan ng mga awitin niyang masarap pauli-uliting kantahin sa videoke. Bilang balladeer-wanna-be, kung hindi Martin Nievera, Gary Valenciano medley ang pinagdidiskitahan ko, madalas kasama ang aking matalik na kaibigan. Ako si Martin, siya si Gary.

Bilang hopeless romantic, marami rin sa mga kanta niya ang pumukaw, at patuloy na pumupukaw sa aking damdamin sa kung anumang estado ng aking puso. Nariyan ang How Did You Know kung in-love, Each Passing Night kung nalulumbay, at Hataw Na! kung napapaindak. Ngunit kagabi, hindi ko inaasahang matutunghayan ko ang ang tambalan nila ni Regine Velasquez, sabay inaawit ang isa sa mga kantang sinubok ko ring kantahin, ngunit mas mabuti na lang sigurong sabihing, isinisigaw ng aking puso. Ayon nga sa kanta:

"Muling hinahanap, ang dating paglingap na mula sa'yo. Muling umaasa, sa dating nadaramang laan sa'yo. Mula nang magwakas, tapusin ang lahat, ay naritong nagmamahal pa rin. Pa'no kaya maibabalik. Ang damdamin mong dati. Ma'ari pa kayang muli." 


Ang pusong nagmamahal, hindi agad-agad susuko at patuloy na kakapit kahit sa pinakamalaiit na pag-asang natitira. Gaano man ang sakit na naidulot ng pag-ibig, pinanghahawakan ang mga masasayang ala-ala ng kahapong pinagsamahan. Sapagkat sa bawat nagmamahal, bago ang pait, ligaya ang sadyang nangingibabaw, laging inaasam ang magpakailanman. 


Nais kong ibahagi ang isa sa mga nakunan kong video mula sa concert na hindi lang nagpaindak, ngunit nangusap sa aking damdamin.


Muli

[Gary]
Muling hinahanap 
Ang dating paglingap na mula sa'yo 
Muling umaasa
Sa dating nadaramang laan sa'yo 
Mula ng magwakas, tapusin ang lahat 
Ay naritong nagmamahal pa rin 
Pa'no kaya maibabalik 
Ang damdamin mong dati 

[Regine]

'Di ba't ikaw pa 
Unang may nais na tapusin na 
Habang panahon 
Pinilit limutin ka hanggang ngayon 
Mula ng magwakas, tapusin ng lahat 
Hindi maikakailang ikaw pa rin 
Papa'no kaya maibabalik Ang hangaring dati 

[Both]
Refrain: 
Ba't di nagkatagpo 
Bakit tuloy nagkalayo 
Bakit mayro'n pang nadarama 
Gayong hindi na tayong dalawa 
Bakit magwawakas 
Pag-ibig na wagas 
Ma'ri bang mangyari pang 
Ibigin pang...Muli 

[Regine]
Kung muling iibigin 
H'wag sanang lisanin nang tulad noon 
Pagluha'y di na kaya 
H'wag na sanang isipin nang tulad gayon 

[Gary]
Hanggang sa nagwakas, 
Natapos ang lahat 
Ay naritong nagmamahal pa rin 
Paano pa ba maibabalik 
Ang hangaring dati 
(Ma'ri pa kayang muli....)

[Both]
REFRAIN: 
Ba't di nagkatagpo 
Bakit tuloy nagkalayo 
Bakit mayro'n pang nadarama 
Gayong hindi na tayong dalawa 
Bakit magwawakas 
Pag-ibig na wagas 
Ma'ri bang mangyari pang 
Ibigin pang...
Muli 

Nandito lang ako (bago lumayo sa pilling mo) 
Higit kang kailangan kailan man (hanggang kailan kaya naman)
Mahala kita (tila) hanap ka (sana) (tunay kaya ito) 
Minsan pang bigyan ng daan 
Pag-ibig na sa'yo nakalaan

[Both]
REFRAIN: 
Ba't di nagkatagpo 
Bakit tuloy nagkalayo 
Bakit mayro'n pang nadarama 
Gayong hindi na tayong dalawa

Mula sa http://www.lyricsmode.com/lyrics/g/gary_valenciano/muli.html

Hanggang sa muli,
Dan

Para sa mga nakararanas ng pighati.

Biyernes, Agosto 1, 2014

Naisulat ko ang tulang ito, mga ilang taon na ang nakalilipas. Sa una yatang pagkakataong nabigo ako sa pag-ibig. Ngayon, nang muli kong mabasa, nalimutan ko na ang sakit na naramdaman habang isinusulat ko ito. Ang mensaheng nais nitong iparating, hindi kailanman mawawaglit. 

Handog ko ito sa lahat ng nakararanas ng pighati. Isang silip sa katotohanan na oo, ‘di maitatanggi ang sakit. Ipipilit nitong magparamdam. Ngunit hindi rin lingid ang katotohanang, may kahit kakaunting natira sa ating sarili na magbibigay ng bagong pag-asa.

Para sa mga nakararanas ng pighati
Saan nga ba napupulot ang mga pira-pirasong bubog ng nabasag na puso?
Sa lakas ng bugso ng hinanakit, lumayo silang lubusan.

Kailan matatapos ang pang-aapuhap sa kanila ng pagal kong damdamin?
kung may pag-asa bang may katapusan, hindi ko alam.

Paano nga ba mapipigilan ang unti-unting pagkaubos at pagkawala ng sarili?
Dahil sa walang patid na paghanap, walang kasiguraduhan.

Ako nga ba ang makabubuong muli ng aking nasirang paniniwala sa pag-ibig?
Hindi kaya’t may isang taong aayos ng lahat, harinawa.

Kung saan man siya naroroon
Kung kailan siya darating
Kung paanong siya’y paparito
Ako’y patuloy na maghahanap
Masidhing maghihintay
Pilit bubuuin ang sariling
Nawasak ng pag-ibig.



Hanggang sa muli,
Dan

SIMULA.

Isang yugto ang natapos, may bagong magsisimula. Simula ngayon, hanggang kung saan man ito makarating, isusulat ko ang aking buhay. Bitbit ang kahapon, babagtasin ang isang mas maliwanag na daan patungong hinaharap. Sa pamamagitan ng mga salita, ipamamalas ang ganda ng buhay na lagi’t laging buhay.

Ang mga nasira, unti-unting bubuuin. Ang mga nawala, isa-isang hahanapin. Ang mga natira, pagyayamanin. Nang makamit ang mithiin ng kahit sinumang nilalang. TUNAY NA KALIGAYAHANG maibabahagi sa KAPWA.

Ako si Danlourd A. de Asis, isang alipin ng teknolohiya, isang anak, kapatid, kaibigan, TAO.

Nabigo. Babangon. Magsisimula.


Hanggang sa muli,
Dan
 

Most Reading

Test